Stormur í aðsigi

Ertu á leið útúr bænum? Ég myndi halda mig heima! Spáin er slæm og í þokkabót verður nóg um að vera í körfunni um helgina*

Strákarnir í meistaraflokk skreppa suður í dag og etja þar kappi við Ármenninga í Kennaraháskólanum kl 20:00. Þórsarar í grennd við höfuðborgina eru hvattir til að mæta en fyrir þá sem ekki eiga heimangengt verður bein tölfræðilýsing á kki.is að vanda.

Á laugardaginn á svo meistaraflokkur kvenna leik við Breiðablik í Síðuskóla. Sá leikur hefst klukkan 15:00. Stelpurnar eiga harma að hefna gegn Blikum eftir súrt tap í Kópavogi.

Sunnudagurinn er svo heldur betur þéttur!

Unglingaflokkur kvenna ríður á vaðið klukkan 12:00 í Síðuskóla og líkt og hjá meistaraflokk er mótherjinn Breiðablik.

Síðan ætla þeir sem hófu helgina að slútta henni sömuleiðis. Strákarnir fá Reynismenn frá Sandgerði í heimsókn í Höllina og hefst sá leikur klukkan 16:00!

Liðin eru súr og svekkt með úrslitin síðustu helgi og ætla sér öll stigin sem í boði eru. Til þess þurfa þau stuðning! Láttu sjá þig og taktu þátt í veislunni!

Áfram Þór

*Undirritaður er leikmaður Þórs og því er tilkynningin örlítið rauðlituð.