Hjátrú Íslendinga

Kaffi: sá sem lætur rjómann í kaffið á undan sykrinum giftist ekki næstu sjö árin. Þeir sem drekka heitt kaffi verða ófríðir en þeir sem drekka það kalt fríkka. Þeir sem drekka mikið kaffi verða aftur á móti geðvondir. Það er ýmist talið láns- eða ólánsmerki að fá óvart tvær teskeiðar í kaffibolla. Ræðst það af því hvort hlutaðeigandi er ungur eða gamall, giftur eða ógiftur. Sumir segja að þá muni hann halda veislu innan skamms eða lenda í veislu hjá öðrum. Aðrir segja að viðkomandi haldi skírnarveislu, eignist tvíbura innan árs eða að hann sé leynilega trúlofaður. Nái menn að drekka loftbólurnar, sem myndast á yfirborði kaffisins þegar því er hellt í bolla, verða þeir vellríkir.

Draumar: Ekki er sama hvar eða hvenær menn dreymir drauma. Draumar sem mann dreymir síðdegis segja fyrir um jákvæðari atburði en draumar sem mann dreymir á nóttunni eða morgnanna. Þeir draumar sem menn dreymir með vaxandi tungli rætast fljótt en sé þverrandi tungl þegar menn dreymir rætast þeir draumar seint. Ákveðin fyrirbæri í draumum virðast menn almennt túlka á svipaðann hátt s.s. að hvítar kindur boði snjókomu, óhreinindi séu fyrir miklum afla eða öðrum gróða. Oft birtast látnir menn í draumum og eru þá yfirleitt með áríðandi skilaboð en þeir geta einnig verið að vitja nafns og eru mörg dæmi um slíkt. 

Hestar: Hesta verður að járna réttsælist svo að verð gangi vel. Byrja skal á hægri framfæti, þá á að járna hægri afturfót, síðan vinstri afturfót og loks vinstri framfót. Sagt var að ferðin gegni eins og fyrsti naglinn þegar hestar voru járnaðir. Margir telja sig geta merkt veðurbreytingar á atferli hesta einsog margra annarra dýra og sýnist þá oft sitt hverjum. Svo dæmi séu tekin þá er talið að þegar hross híma á höm sé von á hrakviðri úr þeirri átt sem þau snúa sér undan. Ókyrrð í hestum er kallað kuldabrölt og veit einnig á illt veður. Liggi hestar í haga að vetri til skellur á vont veður. Velti hross sér um hrygg að aflíðandi vetri er það góðs viti og þá er sagt að þau velti af sér vetrinum.

Páskar: Hér á landi er sagt að séu jól hvít verði páskar rauðir en séu jólin rauð verði páskarnir hvítir. Séu páskar snemma og sólskin er og frost verður töðubrestur um sumarið. Góupáskar boða annaðhvort afar gott vor eða mjög hart. Sumarpáskum fylgir oftast hart vor. Sé vont veður í páskavikunni batnar veðrið upp úr páskum. Milt veður í páskavikunni boðar mjög slæmt veður fljótlega eftir páska.

Núna er bara að bíða og sjá hvort að taka megi örlítið mark á hjátrúnni þar sem að páskarnir eru í næstu viku.