Illa farnir og Justin Bieber

Myndbandið við lag Justin Bieber, ,,I’ll show you”, sem kom út 2.nóvember síðastliðinn, var eins og margir vita allt tekið upp á Íslandi. Í myndbandinu sést Bieber fara víða um Suðurlandið, m.a. við Seljalandsfoss, í Fjaðrárgljúfri á Sólheimasandi og vaða í Jökulsárlóni.
Það sem ekki allir vita er það að hugmyndin á bakvið myndbandið kemur frá vinunum Davíði Arnari Oddgeirssyni og Brynjólfi Löve Mogenssyni.

Davíð og Brynjólfur hafa gert það gott þetta árið með vefþáttum sínum ,,Illa farnir” sem aðgengilegir eru á vef Vísis. Þeir hafa ferðast um landið vítt og breitt ásamt upptökumanni og tekið upp hin ýmsu ævintýri. Þeir nota meðal annars dróna við upptökur sem fangar náttúruna á einstakan hátt.

Aðspurður um hvernig þeir félagarnir hafi komist í samband við Bieber segir Davíð að kunningi hans frá Kaliforníu hafi fylgst með þáttunum í gegnum Facebook. ,,Hann hefur unnið með ýmsum stjörnum þarna úti í skemmtanageiranum. Þrátt fyrir að hann skildi ekki orð af því sem við vorum að segja þá þótti honum myndefnið af landinu okkar svo skemmtilegt og fallegt. Hann fór að sýna fólki þættina okkar svo kemst þetta einhvern veginn í hendurnar á fólki sem er að vinna fyrir Bieber.”

Davíð segir að maður sem vinnur hugmyndavinnu fyrir Bieber hafi þá haft samband við þá í gegnum Skype. ,,Sá hafði verið búinn að horfa töluvert á þetta því hann var búinn að skrifa niður punkta um þá staði sem við höfðum verið á og hann vildi nota í myndbandið. Við einfaldlega sögðum frá nákvæmlega frá þeim staðsetningum í þáttunum sem spurt var um. Síðan spurðum við hvort Bieber væri búinn að sjá þættina og þeir svöruðu því játandi”.  Davíð og Brynjólfur komu því ekkert að myndbandinu sjálfu hjá Bieber en það er augljóslega undir töluverðum áhrifum frá þeim.

Davíð segir myndbandið vera keimlíkt þáttunum sem þeir tóku upp á Suður- og Austurlandi, nokkur skot hafi meira að segja verið alveg eins. Hann segir þetta hafa verið mjög gaman fyrir þá og á sama tíma og hvetjandi að Justin Bieber sjálfur sé að ,,copy-a” þá. Hann segir að með þessu hafi áhorfendahópur þeirra hafa stækkað aðeins og séu þónokkrir Beliebers þar á meðal.

HÉR má sjá myndband sem sýnir líkindin á milli þáttanna og myndbands Biebers.