Rúmlega 25 þúsund krónur boðnar í sokkana hans Guðna

Nú þegar hafa 12 tilboð borist í sokkapar og bindi sem Guðni Th. Jóhannesson, forseti Íslands, gaf í fjáröflun Dropans, styrktarfélags barna með sykursýki. Ágóðinn fer til söfnunar fyrir árlegum sumarbúðum barna og unglinga með sykursýki.

Í frétt á RÚV.is kemur fram að uppboðið sé haldið á ebay, undir yfirskriftinni: Uppáhalds bindi og sokkar forsetans. Bindið er með apamynstri og bar Guðni það í sumar í heimsókn á Sólheima, sem var fyrsta opinbera heimsókn hans í embætti forseta. Í lýsingu uppboðsins er svo tekið fram að munirnir séu notaðir en í vel nothæfu ástandi.

Enn eru fimm dagar eftir af uppboðstímanum, svo ekki er ólíklegt að upphæðin eigi enn eftir að hækka.