Íslendingar í meirihluta sigurliðs Reebok CrossFit Invitational

Það eru ekki nýjar fréttir að Íslendingar skari fram úr í Crossfit keppnum um allan heim en sem dæmi má nefna vann Katrín Tanja titilinn fittest woman on earth á Crossfit leikunum bæði 2015 og 2016. Keppnin var lokakeppni Crossfit tímabilsins á þessu ári og er ekki amalegt fyrir íslensku crossfittarana að enda tímabilið með þessum frábæra sigri. Evrópska liðið samanstóð af Íslendingunum Björgvini Karli Guðmundssyni, Katrínu Tönju Davíðsdóttur, Söru Sigmundsdóttur, Svíanum Lukasi Högberg og bresku Samönthu Briggs.

 Líkt og visir.is greindi frá í morgun er þetta í fyrsta sinn sem Evrópuliðið vinnur liðakeppnina en önnur lið í keppninni voru Bandaríkin, Kanada og Eyjaálfa. Bandaríska liðið voru sigurvegarar í fyrra en í þetta sinn má segja að Evrópuliðið hafi vægast sagt rústað hinum liðunum. Evrópuliðið vann með 23 stig á meðan Bandaríkin voru með 16, Eyjaálfa með 15 og Kanada með einungis 10.