Lína Langsokkur – Haustgleði Þingeyjarskóla

Fyrsta Haustgleði Þingeyjarskóla, grunnskóla í Þingeyjarsveit, var haldin í Ýdölum í nóvember. Haustgleðin var vel sótt en unglingadeild ásamt 2.-3. bekk skólans sýndi leikritið Lína Langsokkur eftir Astrid Lindgren. Stórgóðu handriti voru gerð góð skil og var það einróma álit gesta að krakkarnir hefðu staðið sig með eindæmum vel. Með hlutverk Línu Langsokks fór Jana Valborg Bjarnadóttir og hlaut hún mikið lof fyrir frammistöðu sína enda má segja að hún hafi smellpassað í hlutverkið eins og sjá má á myndum hér fyrir neðan.

Með önnur stærri hlutverk fóru þau Guðrún Gísladóttir (Anna), Benóný Arnórsson (Tommi), Kristjana Freydís Stefánsdóttir (frú Prússólín) og Stefán Óli Hallgrímsson (apinn Níels). Nemendur sáu einnig um sviðsmynd og tónlistarflutning undir leiðsögn kennara sinna.

Látum myndir frá Haustgleði Þingeyjarskóla tala sínu máli.

Ljósmyndir: Halldóra Kristín Bjarnadóttir

Á morgun, þann 1. desember, kl. 11:00 mun Framhaldsskólinn á Laugum bjóða íbúum Þingeyjarsveitar til hátíðardagskrár í tilefni fullveldisdagsins og 90 ára afmæli skólahalds á Laugum. Dagskráin mun fara fram í íþróttahúsinu á Laugum en þar mun Þingeyjarskóli einmitt flytja lokaatriðið úr Línu Langsokk. Að dagskrá lokinni er gestum boðið að þiggja veitingar í matsal skólans.

Við hvetjum íbúa sveitarfélagsins til að þiggja þetta góða boð og njóta.