Stephen Merchant á uppistandshátíð í Hörpu

Reykjavík Comedy Festival, alþjóðleg þriggja daga grínveisla verður haldin í Hörpu dagana 24. - 26. október. Hátíðin sem er á vegum Senu er fyrsta sinnar tegundar hér á landi en hún er haldin í samstarfi við Europe Comedy Fest. Um svipað leyti verða haldnar sambærilegar hátíðir í fleiri löndum eins og í Belgíu, Svíþjóð og Noregi.

Fjölmargir grínistar á heimsmælikvarða munu stíga á svið eins og Jim Breuer sem er á topp 100 lista Comedy Central yfir bestu uppistandara heims og Kerry Godliman sem er talin vera ein sú besta í bransanum. Lokaatriði hátíðarinnar verður síðan í höndum Stephen Merchant sem skrifaði og leikstýrði grínþáttunum The Office og Extras ásamt Ricky Gervais.

Þá verða tveir uppistandshópar með sitthvora sýninguna, einn frá Bretlandi og annar frá Bandaríkjunum. Breski hópurinn samanstendur af Rob Deering, Harriet Kemsley, Sean McLoughlin og Joel Dommett og kemur fram undir merkjum „BBC presents: Best of Fest“. Bandaríski hópurinn nefnist New Yorks Funniest og samanstendur af þeim Andrew Schulz, Ricky Velez og James Adomian.

Íslensku uppistandararnir Saga Garðarsdóttir, Þorsteinn Guðmundsson, Dóri DNA og Ari Eldjárn munu ekki láta sig vanta á þennan stórviðburð en þau sjá um að hita upp salinn fyrir erlendu grínistana.

Nú fer hver að verða síðastur að tryggja sér miða en þá má nálgast í miðasölu Hörpunnar, í síma 528-5050 og á harpa.is. Þeir sem hafa áhuga á að sækja allar fimm sýningarnar fá 20% afslátt af heildarverði en þó ekki í gegnum miðasöluna á netinu.

Allar nánari upplýsingar um hátíðina og dagskrá hennar má finna á heimasíðu hennar www.rcf.is