Samískur augnsvipur Zellweger horfinn

Óskarsverðlaunaleikkonan Renée Zellweger hefur ekki mikið verið í sviðsljósinu undanfarið, enda eru meira en tvö ár síðan hún lék síðast í kvikmynd. Í síðustu viku sást til hins vegar til hennar á rauða dreglinum þegar hún mætti til veislu í Hollywood.

Óhætt er að segja að útlit leikkonunnar hafi vakið mikla athygli því Renée var nánast óþekkjanleg og fóru strax í gang sögusagnir um að hún hafi lagst undir hnífinn til að láta breyta útliti sínu. Sjálf neitar leikkonan öllu slíku og segist vera ánægð með að fólk sjái breytingu á sér enda lifi hún nú mjög heilnæmu lífi og sé hamingjusöm. Segist hún vera sannfærð um að slíkt sjáist á fólki.

Útlitsbreyting Zellweger hefur skapar miklar umræður í netheimum og hafa þær meðal annars snúist um þær útlitskröfur sem gerðar eru til kvenna almennt og sér í lagi í Hollywood. Einnig hafa verið vangaveltur uppi um hvort útlitsbreyting Renée eigi eftir að gera henni erfitt fyrir með að fá bitastæð hlutverk í framtíðinni. Vilja sumir meina að útlit leikara sé þeirra vörumerki og allar stórar breytinga á því vörumerki séu sjaldnast til þess fallnar að gera leikara eftirsóknarverðari.

Þrátt fyrir að leikkonan haldi áfram að neita öllum sögusögnum um að hafa gengist undir fegrunaraðgerð halda bollaleggingarnar áfram og trúa því fæstir að það sé bara breyttur lífstíll leikkonunnar sem liggi að baki. Prófessor í finnskri menningu við háskólann í Uleåborg í Finnlandi,  Edward Dutton að nafni, hefur nú komið fram með kenningu um hvers vegna Zellweger lét breyta útliti sínu. Hann vill meina að leikkonan hafi viljað afmá útlitsleg séreinkenni sín sem rekja megi til ætternis hennar. Faðir Zellweger er svissneskur en móðir hennar er af Samaættum og telur prófessorinn að augnsvipur leikkonunnar áður en hún breytti sér hafi fyrst og fremst átt rætur að rekja til samískra gena hennar. Hún hafi því látið breyta útliti sínu til að afmá þau einkenni.

Hvort að útlitsbreyting leikkonunnar stafar af heilnæmari lifnaðarháttum eða því að hún hafi viljað afmá samísk útlitseinkenni sín er því óljóst, en hins vegar má það ljóst vera að Zellweger tókst með þessu að koma sér rækilega í sviðsljósið aftur eftir nokkuð langa fjarveru.