Allt er hægt ef viljinn er fyrir hendi

Alla mína skólagöngu hef ég átt mjög erfitt með að læra og alltaf fundist ég öðruvísi en aðrir jafnaldrar. Ég átti erfitt með að sitja kyrr, hlusta í kennslustund og að  lesa bók var nú meiri hausverkurinn, halda einbeitingunni við einn hlut var mér ómögulegt.  Lesa fyrir próf og reyna að muna hvað ég var að lesa var ekki auðvelt, enda kom það niður á einkunnunum mínum. Alltaf hef ég verið skipulögð og metnaðarfullur nemandi og þurft að leggja mjög hart að mér til að reyna að standa mig í námi en það var aldrei nóg. Í byrjun á menntaskólaárunum mínum komust kennararnir mínir að því ég var lesblind og talnablind og fékk ég þau úrræði sem í boði voru. Þrátt fyrir það gekk mér ekkert mikið betur í námi. Einhvern veginn á ótrúlegan hátt , með sumarskóla, endurtektarprófum og mikilli þrjósku. náði ég samt að klára stúdentinn. 

            Fyrsta önn í háskóla þá kom alvöru höggið, jólaprófin runnu upp , fyrstu háskólaprófin mín og ég lærði eins og brjálæðingur og fannst mér ég hafa gengið nokkuð vel í prófunum en áfallið kom þegar einkunnirnar birtust, ekki eins og ég hafði búist við og var ég miður mín öll jólin. Eftir allt sem ég hafði lagt á mig fyrir þessi próf.

            Strax í  janúar fór ég að skoða mig um , og leitaði ég til sálfræðings og þar var ég greind með athyglisbrest og ofvirki eða ADHD á háu stigi. Þeir sem þekkja mig vel, komu þessar fréttir nú ekkert sérlega á óvart. Ég var sett á rétt lyf og var fór í skoðun reglulega. Vorönninn hófst , ég enn miður mín eftir jólaprófin en ákvað að kýla á þessa önn og vonast til þess að hún yrði betri en sú fyrri. Vorönninn flaug áfram og áður en maður vissi var komið af þessum blessuðu prófum enn eina ferðina enn. Stelpan fór í prófin og viti menn, hún náði öllum prófunum sem hafði aldrei gerst á minni skólagöngu. Ég fór í SUMARFRÍ á réttum tíma með samnemendum mínum. Sjaldan hef ég verið eins stolt af sjálfri mér eins og þegar lokaeinkannirnar birtust. Öll þessi þrjóska hafði skilað sér, loksins. Ekkert í lífinu er auðvelt og á ekki að vera það, sigrarnir eru mun sætari ef við þurfum að vinna extra hart að því að ná þeim. 

            Með þessu vil ég segja við fólk í skóla og bara í öllu sem við tökum okkur fyrir hendur er að hafa trú á okkur, við getum allt sem við viljum og það tekst allt á endandnum ef viljinn er bara nógu mikill.   Ef ég get þetta geti þið þetta líka.