Tölvuárásir lömuðu margar af stærstu heimasíðum veraldarvefsins

Margir vöknuðu eflaust við vondan draum þann 21. október síðastliðin, þegar margar af vinsælustu heimasíðum internetsins voru óaðgengilegar megnið af deginum. Um er að ræða eina af breiðustu tölvuárásum sögunnar þar sem margar af vinsælustu heimasíðum internetsins lágu niðri. Þá ber helst að minnast á Amazon, CNN, Imgur, Netflix, PayPal, Playstation Network, Reddit, Soundcloud, Spotify, Tumblr, Twitter, Visa og Xbox live, en þetta mun aðeins vera rjóminn af þeim síðum sem urðu fyrir áhrifum árásarinnar.

Um er að ræða tölvuárás af taginu DoS (Eða Denial-of-Service) sem gerð var á Lén-fyrirtækið Dyn, sem sinnti þjónustu þessarar heimasíðna í stærsta hluta Bandaríkjanna og Evrópu. Það fól í sér að gríðarlegur fjöldi IP-netfanga heimsóttu síðuna á sama tíma, eða hátt í tug milljóna slíkra, aðallega rakið úr nettengdum hlutum eins og myndavélum, netkössum eða jafnvel hitamælum sem innihéldu vírus af taginu Mirai. Þessi margföldun á heimsóknum gerði það að verkum að álagið var síðunum um megn og skildi þau eftir lömuð.

Tölvuhakkarahópurinn New World Hackers hafa yfirlýst sig ábyrga fyrir árásinni, en ekki hafa yfirvöld staðfest að um svo sé.

Lesendur landpóstsins urðu hinsvegar ekki varir við neitt, þar sem þeirra síða slapp sem betur fer undan árásum hakkaranna.