Þá var kátt í Höllinni

Annað kvöld fer fram ein stærsta vímuefnalausa skemmtun landsins. Tæplega 1000 manns munu leggja undir sig Íþróttahöllna en þá munu nemendur Menntaskólans á Akureyri skemmta sér ásamt kennurum á árlegri árshátíð skólans.

Skemmtunin hefst með borðhaldi klukkan 19:00 og í framhaldi munu nemendur stíga á stokk með hin ýmsu skemmtiatriði svo sem tónlistaratriði, atriði frá myndbandafélögunum SviMa, StemMa og KlemMa sem og frá leikfélagi skólans.

Að skemmtiatriðum loknum í kringum miðnættið munu tvær landsþekktar hljómsveitir stíga á stokk. Annars vegar er um að ræða rafpopp sveitina FM Belfast sem hefur gert það gott í þónokkurn tíma og hins vegar skagfirsku strákana í Úlfur Úlfur sem eru um þessar mundir eitt heitasta hip hop band landsins.

Gera má ráð fyrir að gleðin verði svo sannarlega við völd og eru þessi frábæru ungmenni okkar frábært dæmi um að vel sé hægt að skemmta sér án áfengis.