Úrslit Íslandsmeistaramótsins í klassískum kraftlyftingum

Íslands­meist­ara­mótið í klass­ísk­um kraft­lyft­ing­um fór fram í Hertz höllinni á Seltjarnarnesi í gær.  Alls voru 49 keppendur skráðir og var mjög góð mæting áhorfenda.

Stiga­hæst kvenna var Helga Guðmunds­dótt­ir (LFH) með 408,2 Wilks-stig. Helga keppti í -72 kg flokki.  Hún lyfti 135 kg í hné­beygju, 95 kg í bekkpressu og kláraði mótið með 160 kg í rétt­stöðulyftu.  Sam­an­lagður ár­ang­ur henn­ar var því 390 kg sem landaði henni bronsi í 72 kg flokki.

Stiga­hæst­ur karla var Vikt­or Samú­els­son (KFA) með 442,8 Wilks-stig. Vikt­or sigraði í sín­um flokki, -120 kg fl. þar sem hann lyfti 770 kg sam­anlagt.  Viktor lyfti 275 kg í hné­beygju, 200 kg í bekkpressu og 295 kg í rétt­stöðulyftu.  Vikt­or gerði til­raun við Norðulanda­met ung­linga í klass­ískri bekkpressu með 214 kg en hún fór ekki upp að þessu sinni.

Önnur úr­slit og met:

Hné­beygju­bik­ar kvenna hlaut Birgit Rós Becker (Breiðablik), sem keppti í 72 kg fl. og beygði 165 kg (163,5 Wilks-stig), sem er nýtt Íslands­met.

Hné­beygju­bik­ar karla hlaut Ein­ar Örn Guðna­son (Akra­nes), sem keppti í 105 kg fl. og beygði 275 kg (164,2 Wilks-Stig), sem er nýtt Íslands­met.

Bekkpressu­bik­ar kvenna hlaut Fann­ey Hauks­dótt­ir (Gróttu), sem keppti í 63 kg fl. og bætti eigið Íslands­met með 108 kg (116,7 Wilks-stig).

Bekkpressu­bik­ar karla hlaut Dag­finn­ur Ari Normann (Stjörn­unni), sem keppti í 83 kg fl. og sló eigið Íslands­met með 170 kg lyftu (115,9 Wilks-stig).

Rétt­stöðulyftu­bik­ar kvenna hlaut Ragn­heiður Kr. Sig­urðardótt­ir (Gróttu), sem keppti í 57 kg fl. og setti nýtt Íslands­met með 151,5 kg (177,1 Wilks-stig).

Rétt­stöðulyftu­bik­ar karla hlaut Ingvi Örn Friðriks­son (KFA), sem keppti í 105 kg fl. og lyfti 290,5 kg (175,6 Wilks-stig) sem er nýtt Íslands­met.